ගුවන් තොටුපොළට ඇතුළු වීම පිළිබද රේගු පනත අලුත් කරයි
- October 25, 2022
- No Comment
- 35
රේගුවේ නිලධාරින්ගේ හැසිරීම ගුවන්තොටුපොළ ආරක්ෂාවට තර්ජනයක්
ජාත්‍යන්තර ආරක්ෂක ක්‍රමවේද නොතකමින් රේගු නිලධාරින්ට ගුවන් තොටුපොළට ඇතුළු වීමට ඉඩ සලසා දී ඇති රේගු පනත වහාම වෙනස් කිරීමට ජනපති රනිල් වික්‍රමසිංහ උපදෙස් ලබා දී ඇත.
ගුවන් තොටුපොළට ඇතුළුවීම සඳහා ලබාදෙන බලපත්‍රය (Access permit) භාවිත කිරීම රේගු නිලධාරින් ප්‍රතික්ෂේප කිරීම මෙයට හේතුවී තිබේ.
හිටපු ජනපති ගෝඨාභය රාජපක්ෂද, රේගු පනත වහාම සංශෝධනය කර රේගු නිලධාරින්ටද ගුවන් තොටුපොළට ඇතුළුවීමේදී බලපත්‍රය ලබා දීමට අවශ්‍ය කටයුතු යොදන ලෙස දැනුම් දී තිබී ඇත.
නමුත් වෘත්තීය සමිති ක්‍රියාමාර්ගවලට බියෙන් එවකට එය ක්‍රියාත්මක වී නොමැත. ජාත්‍යන්තර අයිකාවෝ නීතිය අනුව ගුවන් තොටුපොළට ඇතුළුවන සියලුම ආයතනවල නිලධාරින් තම ආයතන ප්‍රධානියා මගින් සිවිල් ගුවන් සේවා දෙපාර්තමේන්තුවෙන් ඇතුළුවීමේ බලපත්‍රය ලබාගත යුතුය. එම බලපත්‍රය ඉල්ලුම්කරන සෑම අයකුවම ආරක්ෂක අමාත්‍යාංශය මගින් රාජ්‍ය බුද්ධි ප්‍රධානි හා රාජ්‍ය ඔත්තු සේවාවේ ප්‍රධානියා වෙත යොමුකර නිෂ්කාශන වාර්තා ලබාගත යුතුය.
රේගු නිලධාරින් හැර අනෙක් සියලුම ආයතන ගුවන් තොටුපොළවලට ප්‍රවිෂ්ට වීමට එම ක්‍රමවේදය යටතේ ඉලෙක්ට්‍රොනික අවසර පත් ලබාගෙන ඇත.
රේගු නිලධාරින් එම බලපත්‍රය ප්‍රතික්ෂේප කර ගුවන් තොටුපොළට ඇතුළුවීම සඳහා තම හැඳුනුම්පත හා නිල ඇඳුම මෙතෙක් භාවිත කරන්නේය. එමගින් සේවයෙන් පහ කළ හෝ සේවය අත්හිටුවූ නිලධාරින්ට වුව ගුවන් තොටුපොළ වෙත ඇතුළුවීමට අවකාශ සැලසී ඇති බැවින් ගුවන් තොටුපොළ අනාරක්ෂිත වී ඇතැයි ආරක්ෂක බලධාරීහු පෙන්වා දී ඇත.
