යළි ජීවමාන වූ එංගලන්තයේ රෝස කුසුම..

ලොව පුරා මිලියන ගණනාවක ජනතා සිත් එක බැල්මකින් වසඟ කළ එංගලන්තයේ රෝස කුසුම වන ඩයනා කුමරියගේ පිළිරුවක් පසුගියදා ලන්ඩන් නුවරදී විවෘත විය.

ඩයනා කුමරියගේ 60 වන ජන්ම දින සංවත්සරය වෙනුවෙන් මෙම නව පිළිරුව එළි දැක්වීය.

ඒ , කෙන්සින්ටන් මන්දිරයේ ( Kensington Palace ) සන්කෙන් උද්‍යානයේදී ය.

විදෙස් මාධ්‍ය වාර්තා කරන්නේ, මෙම උද්‍යානයේ ඩයනා කුමරියගේ ප්‍රියතම මල් 4,000 ක් පමණ රෝපණය කර තිබෙන බවය.

විලියම් සහ හැරී කුමරු නව ප්‍රතිමාව විවෘත කිරීමට එක්ව සිටියේය.

රාජකීය විචාරකයින් පවසන්නේ, ඩයනා කුමරියට උපහාර දැක්වීම සඳහා විලියම් සහ හැරී කුමරුන් නැවත එක්වීම ඔවුන් අතර ඇති භේදය සුව කිරීමේ වැදගත් මෙන්ම පළමු පියවරක් විය හැකි බවයි.

විලියම් සහ හැරී කුමරුන් අවසන් වරට එකට මුණගැසුණේ දෙවන එලිසබෙත් රැජිනගේ සැමියා වන පිලිප් කුමරුගේ අවමංගල්‍ය උත්සවයේදී ය.

නව පිළිරුව එළි දැක්වීමේ උත්සවයට ඩයනා කුමරියගේ සහෝදරයා වන චාල්ස් ස්පෙන්සර් (Charles Spencer) සහ ඇගේ සහෝදරියන් දෙදෙනා වන සාරා මැකෝර්කෝඩේල් (Sarah McCorquodale) සහ ජේන් ෆෙලෝස් (Jane Fellowes) ඇතුළු අමුත්තන් කිහිපදෙනෙක් පමණක් සහභාගී වූහ.

ඩයනා කුමරිය සහ ඇය වටා සිටින දරුවන් තිදෙනෙකුගෙන් එම පිළිරුව නිමවා තිබූ අතර , කෙන්සිංටන් මාළිගය (Kensington Palace) පැවසුවේ, ඩයනා කුමරියගේ අලංකාරය සහ ශක්තිය පිළිබිඹු කිරීම මෙම ප්‍රතිමාවේ අරමුණ බවයි.

රාජකීයත්වය අත්හැර සාමාන්‍ය ජීවිතය අගය කළ ජනතාවගේ කුමරිය වූ ඩයනා 1997 දී ප්‍රංශයේ පැරිස් නුවර උමං මඟක සිදුවූ රිය අනතුරකින් මිය ගියේ ය.

එවිට ඇගේ වයස අවුරුදු 36කි.

– රංජීත් පෙරේරා –